अंधश्रद्धा: प्रश्नचिन्ह आणि पूर्णविराम - प्रश्न ३०

 *_प्रश्न ३०- झपाटलेली व्यक्ती जन्मात कधी न बोललेली भाषा बोलू शकते. हे आम्ही पाहिलेले आहे.याचा काय खुलासा द्याल?_*

 

 *उत्तर 👉*  दुसऱ्याआत्म्यानेझपाटल्यामुळेअगरभुतानेझपाटल्यामुळेअगरमागच्याजन्मातीलस्मृतीमुळे व्यक्ती न बोललेली भाषा बोलू शकते, हा समज खरा नाही. न बोललेली भाषा बरळणे ही पूर्वग्रहातून आलेली मानसिक विकृती आहे. या विकृतीस Glassolalia असे म्हणतात. या विकृतीमध्ये व्यक्तीत शारीरिक बदल होत नाहीत. केवळ बोलण्यात बदल होतो. अशा व्यक्तीचे निरीक्षण केल्यास खालील गोष्टी आढळून येतात.

 

१. अशी व्यक्ती कधी न बोललेली भाषा बोलू शकते हे खरे नसते. त्या भाषेतील ऐकलेले काही शब्द तुटकपणे बोलले जातात. पण त्याचे वर्णन मात्र अतिरंजितपणे केले जाते. अशा व्यक्तीचे बोलणे टेप केले व ती भाषा येणाऱ्या दुसऱ्या व्यक्तीस ऐकविले, तर दोन-चार शब्दांपलीकडे कोणत्याही प्रकारचे सारखेपण त्यात आढळत नाही.

२. अशी व्यक्ती जन्मात कधी न ऐकलेली भाषा बोलू शकत नाही. भारतातील व्यक्ती हिंदी, कन्नड, गुजराती तुटकपणे बोलू शकेल पण (अपवाद वगळता) जर्मन, संस्कृत, फ्रेंच भाषा बोलू शकणार नाही. कारण ती भाषा कानावर पडणे व समजणे याची शक्यता फारच कमी असते.

अंगात आलेला आत्मा अगर देव कोणत्याही भाषेत बोलू शकला पाहिजे. पण असे घडत नाही. अब्राहम कोवूरांच्या २२ आव्हानांपैकी १४ वे आव्हान या संदर्भात आहे ते खालीलप्रमाणे-

पुनर्जन्मामुळे अगर पवित्र वा दुष्ट आत्म्याने झपाटल्यामुळे पूर्वी न ऐकलेली भाषा एखादी व्यक्ती बोलू शकत असेल, तर अशा व्यक्तीस १ लाख रुपयांचे आव्हान कोवूरांनी दिले आहे. हे आव्हान आजतागायत कोणीही स्वीकारलेले नाही.

 

*डॉ. नरेंद्र दाभोलकर व प्रा. प. रा. आर्डे*

*यांनी लिहिलेल्या 'अंधश्रद्धा: प्रश्नचिन्ह आणि पूर्णविराम' या पुस्तकातून साभार*

https://mikamblemahesh.blogspot.com/